Tusagassiortunngorniat ilinniartitaanerat pillugu Namminersornerullutik Oqartussat nalunaarutaat nr. 28, 26. juli 2001-imeersoq.
Tusagassiortunngorniat ilinniartitaanerat pillugu Inatsisartut peqqussutaanni nr. 6-imi, 30. oktober 1995-imeersumi § 2, imm. 2, § 4 aamma § 5, imm. 3 naapertorlugit makku aalajangersarneqarput:
Kapitali 1.
Ilinniartitaanerup aqunneqarnera§ 1. Tusagassiornermik Ilinniarfimmi Ilinniagaqarnermi Siunnersuisoqatigiinnik pilersitsisoqassaaq. Ilinniagaqarnermi Siunnersuisoqatigiit arfineq-marlunnik ilaasortaqassapput:
1) Ilaasortaq ataaseq Ilinniartitaanermut Pisortaqarfimmit toqqagaq.
2) Ilaasortaq ataaseq Tusagassiortut Peqatigiiffiannit toqqagaq.
3) Ilaasortaq ataaseq Kalaallit Nunaata Radiuanit (KNR) aamma Kalaallit Nunaanni TV-utileqatigiinnit radioutileqatigiinnillu (FTV) toqqagaq.
4) Ilaasortaq ataaseq tusagassiuutinit naqitanit nuna tamakkerlugu saqqummersartunit toqqagaq.
5) Ilinniarfimmi pisortaq.
6) Ilaasortaq ataaseq ilinniarfimmi ilinniartitsisut siunnersuisoqatigiiffiannit toqqagaq.
7) Ilaasortaq ataaseq ilinniartut akunnerminni toqqagaat.
Imm. 2. Ilinniagaqarnermi Siunnersuisoqatigiinni ilaasortat siunnersuisoqatigiinni ilaasortaasassapput ilaasortamik pineqartumik toqqaasimasup toqqaasimanerminik utertitsinissaata aammalu nutaamik toqqaanissaata tungaanut.
Imm. 3. Siunnersuisoqatigiinni ilaasortat tamarmik sinniisussaannik toqqaasoqartassaaq.
Imm. 4. Ilinniagaqarnermi Siunnersuisoqatigiit suliassanik pineqartunik inunnik immikkut ilisimasalinnik peqataatitaqartarsinnaapput.
Imm. 5. Ilinniagaqarnermi Siunnersuisoqatigiit siulittaasulerlutik siulittaasullu tullilerlutik namminneq inissitsitissapput. Ilinniagaqarnermi Siunnersuisoqatigiit suleriaasissartik nammi-neerlutik aalajangersartassavaat, tassunga ilanngullugit ulluinnarni aqutsisunik pilersitsineq. Suleriaasissat Ilinniartitaanermut Pisortaqarfimmit akuerineqartassapput.
Imm. 6. Tusagassiornermik Ilinniarfik Ilinniagaqarnermi Siunnersuisoqatigiinnut allattoqarfiuvoq.§ 2. Ilinniagaqarnermut Siunnersuisoqatigiit Tusagassiornermik Ilinniarfimmut tunngasunik siunnersuisartuupput aammalu Ilinniartitaanermut Pisortaqarfimmut inassuteqarsinnaallutik.
Imm. 2. Sulilluni sungiusarfiit Ilinniagaqarnermut Siunnersuisoqatigiinnit akuerineqassapput, tak. § 9, imm. 2.
Imm. 3. Ilinniartitaanermut Pisortaqarfik Ilinniagaqarnermi Siunnersuisoqatigiit aamma Tusagassiornermik Ilinniarfimmik oqaaseqaateqartitsereernikkut Ilinniagaqarnermi Siunnersuisoqatigiit malittarisassanik aalajangersaasinnaavoq.§ 3. Ilinniarfimmi pisortaq Ilinniartitaanermut Pisortaqarfiup inassuteqarneratigut Naalakkersuisunit atorfinitsinneqartassaaq. Ilinniartitsissutitut sammisanut sulianut aalajangersimasunut ilinniartitsisut sulisullu allat Tusagassiornermik Ilinniarfiup inassuteqarneratigut Naalakkersuisunit atorfinitsinneqartassapput.
§ 4. Tusagassiornermik Ilinniarfik ilinniartitaanermut tunngasumik ilinniartitaaneq pillugu aaqqissuussinermik suliaqartassaaq, ikinnerpaamik makkuninnga imaqartussanik
1) ilinniartitaanerup imaa, ilinniartitsinermi nalunaaquttap-akunnerisa amerlassusiat aamma ilinniagassani ataasiakkaani ilinniartitsissutissatut sammisassanut ilitsersuutit, piffissat immikkut suliaqarfissat suliamillu sungiusarfissat taakkulu ilinniartitaanerup ingerlanerani inissisimaffissaat,
2) allattarissanik suliat tunniunneqartarnissaat pillugit malittarisassat, taakkununnga ilanngullugit tunniussat ataasiakkaarluni suleqatigiikkuutaarluniluunniit pisinnaanerat pinissaalluunniit,
3) ilinniartitaanerup ingerlanerani misilitsittarnissat allaaserineqarnerat kiisalu taakku ilinniartitaanerup ingerlanerani inissisimanissaat,
4) misilitsinnerit ilusaasa atorneqartut allaaserineqarnerat, tassunga ilanngullugit suleqatigiikkuutaarluni misilitsinnerni peqataasut amerlassusissaat,
5) misilitsinnerit soorliit karakteriliiffigineqartassanersut pillugit takussutissiat, aammalu misilitsinnerit sorliit naliliiffigineqassasut ima "angusivoq" imaluuniit "angusinngilaq",
6) ima naliliinernut "angusivoq" imaluunniit "angusinngilaq" piumasaqaatinut erseqqissaatit,
7) napparsimasimanermi soraarummeersitsineq aamma misilitseqqinneq,
8) ilinniartunngortussatut nalunaarutigineqartut amerlassusii malillugit atuaqatigiinnik avitsisarnerit kattussisarnerillu pillugit malittarisassat,
9) taarsiullugu sulianik tunniussisarnerit,
10) ilinniartitsinissamik pilersaarutit, aamma
11) takkutinngitsoornernut malittarisassat nalinginnaasut.
Imm. 2. Tusagassiornermik Ilinniarfik pisinnaatinneqarsinnaavoq ilinniartitaanerup aaqqissuussaanerani aalajangersakkanit immikkut ittumik akuersissuteqarnermik imaqartunik ilinniartitaanerup aaqqissuussaanerani aalajangersakkanik ilanngussinissamut.
Imm. 3. Ilinniartitaanermik aaqqissuussineq Ilinniartitaanermut Pisortaqarfimmut akuerisassanngorlugu nassiunneqartassaaq.
Kapitali 2.
Ilinniartunngortussanik tigusisarnermi piumasaqaatit§ 5. Tusagassiornermik Ilinniarfik ilinnialerniarlutik qinnuteqaateqartut akuerisinnaavaat:
1) ilinniarnertuunngorlutik angusisimasut,
2) § 6 naapertorlugu ilinniartunngorniarluni misilitsinnermi angusisimasut,
Imm. 2. Tusagassiornermik Ilinniarfiup qinnuteqartut allamik atuagarsornermut sulinermulluunniit naleqquttunik imalimmik ilinniagallit imm. 1-imi, nr. 2-mi piumasaqaatinik naammassinnissimasut ilinniartunngortussatut akuerisinnaavai.§ 6. Ilinniartunngorniarluni misilitsitsissutissaq Tusagassiornermik Ilinniarfimmit suliarineqassaaq. Misilitsissutissaq ilusilerneqassaaq ilinniartunngorniarluni qinnuteqartup tusagassiornermut tunngasutigut eqqarsariaatsimut misikkarissusia, inuiaqatigiinni pissutsit atuuttut pillugit tamatigoortunik ilisimasaqassusia kiisalu oqaatsitigut pisinnaasai saqqummersittussanngorlugit.
Imm.2. Ilinniartunngorniarluni misilitsinneq sumiiffinni assigiinngitsuni ataatsikkut ingerlanneqassaaq piffissaq eqqorlugu qinnuteqaateqarlutik nalunaarsimasunit kiisalu ilinniartunngornissamut piumasaqaatinik allanik, § 5 naapertorlugu, naammassinnittunit peqataaffigineqarluni aamma Tusagassiornermik Ilinniarfiup misilitsinnissamut piffissalersuilluni aalajangigai malillugit. Ilinniarfimmi pisortaq misilitsinnerit ingerlanneqarnerannut akisussaavoq.
Kapitali 3.
Ilinniartitaanerup imaa il.il.Ilinniartitaanerup ilusaa
§ 7. Ilinniartitaaneq ukiut pingasut affarlu sivisussuseqartussatut naatsorsuussaavoq piffissanullu immikkoortunut arfineq-marlunnut aggugaalluni, imalu ilusilersugaalluni:
1) immikkoortoq siulleq atuagarsorluni sulianullu aalajangersimasunut sammisunik ilinniartitsineruvoq.
2) Immikkoortut aappaat sulilluni sungiusarneruvoq.
3) Immikkoortut pingajuat atuagarsorfiuvoq sulianullu aalajangersimasunut sammisunik ilinniarneruvoq.
Ilinniagassatut sammisat aaqqissuunneqarnerat piffissallu sulilluni sungiusarfiusut
§ 8. Immikkoortumut siullermut ilinniagassatut sammisanut makku ilaapput:
1) Tusagassiorneq.
2) Oqaatsit.
3) Tusagassiorneq attaveqaqatigiinnerlu pillugit atuagarsornikkut ilisimasassat.
4) Tusagassiinermi malittarisassaqarneq.
5) Ileqqorissaarneq/ Pissuserissaarneq.
6) Inuiaqatigiilerineq.
Imm. 2. Immikkoortut pingajuannut ilinniagassatut sammisassanut makku ilaapput:
1) Tusagassiorneq.
2) Inuiaqatigiilerineq.
3) Oqaatsit.
Imm. 3. Ilinniartitaanermut Pisortaqarfik, pissutsit immikkut ittut atuutsillugit ilinniartitaanerulluunniit ineriartortinneqarneranut ilaatillugu imm. 1-imi 2-milu aalajangersakkat immikkut ittumik akuersinikkut sanioqqussinnaavai.§ 9. Immikkoortut aappaani qaammatini 18-ini sulilluni sungiusartoqassaaq. Sulilluni sungiusarneq radiomik tv-millu ingerlataqarfinni aammalu naqitanik tusagassiorfinni ingerlanneqartassaaq. Sulilluni sungiusarneq nalinginnaasumik Kalaallit Nunaanni pisassaaq.
Imm. 2. Sulilluni sungiusarfiusussaq Ilinniagaqarnermi Siunnersuisoqatigiinnit akuerineqarsimassaaq. Sulilluni sungiusarfiusussaq aatsaat akuerineqartassaaq ikinnerpaamik tusagassiortoq ilinniarsimasoq ataaseq sulilluni sungiusarfiusussami sulisorineqarpat.
Imm. 3. Piffissat sulilluni sungiusarfiusut ilinniartup makkuninnga atugassaqartitaalluni ingerlattassavai:
1) ilinniartoq sulilluni sungiusarfissamut akuerisaasumut sulilluni sungiusarnissaminik nammineerluni qinnuteqaateqartassaaq.
2) Tusagassiornermik Ilinniarfik aamma sulilluni sungiusarfissaq sulilluni sungiusaatissat pillugit isumaqatigiissuteqartassapput. Sulilluni sungiusarnissaq pillugu isumaqatigiissutit naapertorlugit ilinniartoq sulilluni sungiusarfimmi sulinermut peqataasussaatitaavoq.
3) Ilinniartup sulilluni sungiusarfimmi akisussaasumik ilitsersuisoqarnissaa aamma sulilluni sungiusarnerup akuttunngitsunik naliliiffigineqartarnissaa Tusagassiornermik Ilinniarfiup qularnaagassaraa.
Imm. 4. Sulilluni sungiusarnerup ilaa tusagassiortutut suliffimmi, ilisimatusarfimmi imaluunniit Kalaallit Nunaanni avataaniluunniit ilinniarfimmi pisortanit akuerineqartumi ilinniarnertut sivisunerpaamik qaammatini arfinilinni ingerlanneqarsinnaavoq. Tusagassiornermik Ilinniarfiup taama ilinniakkanik ingerlatsineq akuerissavaa aammalu ilinniartoq ilinniarfillu suleqatigalugit ingerlanissaa aaqqissuutissallugu. Taama ilinniakkanik ingerlatsineq ilinniartumit ataatsimit imaluunniit ilinniartunit arlariinnit ataatsimoortunit ingerlanneqarsinnaavoq.
Ilinniarnerup immikkoortuini suliassat inaarutissamillu soraarummeerusiorneq
§ 10. Immikkoortumi siullermi ilinniartoq nammineerluni sammisamik suliamik nammineq toqqakkaminik suliaqassaaq aamma sammisamik tusagassiuummillu nammineq toqqakkaminik suliaqarluni.
§ 11. Ilinniarnermut naammassissutitut ilinniagaqartoq ilinniarnermi immikkoortut pingajuanni inaarutissamik soraarummeerusiussaaq. Ilinniagaqartoq nammineerluni sulissaaq, kisiannili sioqqutsisumik siunnersorneqareertassalluni. Sammisaq tusagassiuullu atorneqartussaq nammineq toqqarneqassapput.
Ilinniagaqarnermi peqataaneq, ingerlaqqinneq, anisitaaneq unitsitsiinnarnerlu
§ 12. Ilinniartoq ilinniagaqarnermini peqataanissaminut pisussaaffeqarpoq.
Imm. 2. Ilinniagaqarnermi peqataaneq ilinniartitsinermut aalajangersimasunik pilersaarutigineqartunut sammisaqarfiusunullu peqataanertut suliassanillu tunniussisarnertut nalunaarsorneqartassaaq.§ 13. Ilinniartoq ilinniarnerup immikkoortuaniit ilinniarnerup immikkoortuanut tulliuttumut ingerlariaqqitsinnagu ilinniagaqarnermi peqataanera, tak. § 12, imm. 2, ilinniarfiup pisortaanit akuerineqartassaaq, takuulli imm. 5. Ilinniartup ilinniagaqarnermi peqataanera akuerineqarsinnaanngippat ilinniartup ukiumik ilinniarfiusumik tamakkiisumik ilaannakortumilluunniit uteqqiinissaa pisortamit akuersissutigineqarsinnaavoq.
Imm. 2. Immikkoortut aappaannik aallartitsinissaminut ilinniagaqartoq immikkoortumi siullermi suliani marlunni pineqartuni minnerpaamik karakteri 6 angusimassavaa, tak. § 10 aamma ilinniagaqarnermi peqataaneq, tak. imm. 1, akuerineqarsimassaaq.
Imm. 3. Immikkoortut pingajuannik aallartitsinissamut ilinniagaqartup immikkoortut aappaanni sulilluni sungiusarluni peqataasimanera akuerineqarsimassaaq. Taamaattoorli ilinniarfimmi pisortaq, pissutsit immikkut ittut tamanna pisariaqalersippassuk, ilinniarnermi immikkoortut arfineq-aappaannik aallartitsisoqarnissaanut akuersissuteqarsinnaavoq, naak sulilluni sungiusarneq ataaseq arlallilluunniit akuerineqarsimanngikkaluartut.
Imm. 4. Ilinniartut ilinniagaqarnermi peqataanerat akuerineqarsimanngikkaluarpalluunniit, tak. imm. 1, ilinniartitaanerminni immikkoortup tullianut ingerlaqqikkumallutik pisortaq qinnuteqarfigisinnaavaat. Immikkut akuersissuteqarneq nalunaarutigineqarsinnaavoq ilinniartoq suliassaminik suliareriigassaraluamut taarsiussamik Tusagassiornermut Ilinniarfiup piumasarisaanik allattariarsukkamik tunniussippat. Ilinniagaqarneq nangeqqinneqassappat suliaq naammaginartutut nalilerneqarsimassaaq.§ 14. Ilinniarfimmi pisortaq aalajangiisinnaavoq ilinniagaqartoq ilinniartitaanermit anisitaassasoq ilinniagaqartoq
1) arlaleriarluni sivisuumilluunniit § 12 naapertorlugu pisussaaffimminik naammassinnissimanngippat naak allakkatigut eqqaasinneqartaraluarluni tamatumalu kingornatigut allakkatigut mianersoqquneqaraluarluni,
2) ilinniagaqartut allat ilinniarfiulluunniit sulisuisa peqatiginissaannut maleruagassat nalinginnaasut sakkortuumik sumiginnarsimappagit,
3) ataavartumik nappaateqarnermik, nakorsaatinik aanngajaarnartunilluunniit atornerluinermik assigisaannilluunniit pissuteqartumik allat peqqissuunissaannik isumannaatsuunissaannilluunniit ima akornuseeratarsinnaappat allaat ilinniartoqatiminut akornutaasinnaalluni, imaluunniit
4) ilinniartoq ilinniakkaminik ingerlatsiinnarnissaminut erseqqissumik naleqqutinngitsunik iliuuseqarsimappat.§ 15. Ilinniarneq unitsitaq aatsaat ingerlateqqilerneqarsinnaavoq ilinniartunngoqqinnissamik qinnuteqareernikkut, tak. § 5.
Imm. 2. Taamaattoq pissutsit immikkut ittut atuutsillugit ilinniarfimmi pisortap akuersineratigut ilinniarneq sulilluni sungiusarfissaqannginnermik pissuteqartumik, ilinniartitaanermik unitsitsigallarnermi taamatuttaaq naartunerup erninerullu nalaani ilinniarnermik unitsitsigallarnermi aamma napparsimanermik uppernarsaatitalimmik pissuteqartumik peqataannginnermi unitsikkallagaq aallarteqqinneqarsinnaavoq.
Ilinniagassatut sammisani ataasiakkaani siunertarineqartut
Imm. 1
§ 16. Ilinniagassatut sammisami tusagassiornermi ilinniartut makkuninnga angusaqarnissaat siunertaavoq:
1) tusagassiornermi tunngaviusumik ilisimasaqalerneq, soorlu nutaarsiassanik eqikkaaneq, nutaarsiassanik nalunaaruteqarneq, apersuineq, imartuumik tusarnaagassiorneq, tunuliaqutsiisunik allaaserisaqarneq aammalu eqqartuussivinni imaqarniliortarneq.
2) tusagassiortutut periaatsinik atuinissamik sungiusarneq,
3) nutaarsiassat suunerannik immikkoortiterisinnaanermik ilisimasaqalerneq,
4) eqqaamasassanik allattuigasuarsinnaanermik ilikkagaqarneq aammalu misissuinermi atugassanik aaqqissuussinermik sungiusarneq,
5) tusagassiortutut sunnerniarneqarsinnaanermik ilisimaarinninneq aammalu tusagassiornermi pitsaasunik ileqqorissaarnissamik/pissuserissaarnissamik ilisimaarinninneq, aamma
6) sulianik naammassineqareersimasunik aaqqissuussinermik sungiusarneq.§ 17. Ilinniagassatut sammisami inuiaqatigiilerinermi anguniagaapput ilinniartut inuiaqatigiit aaqqissuussaanerannik ineriartortitsivigineqarnerannillu ilisimasaqalernissaat, taamaaliornikkut paasissutissanik makkununnga tunngasunik naliliisarlutik misissueqqissaarsinnaanngortillugillu ajornartorsiutinik erseqqissaasinnaanngortillugillu siaruarterisinnaalersissallugit:
1) nunatsinni naalakkersuinikkut ingerlatsinermut,
2) aningaasarsiornermut, aamma
3) eqqartuussiveqarnermut.§ 18. Ilinniagassatut sammisami oqaatsini anguniagaavoq ilinniartut
1) kalaallit oqaasiisa pissuseqatigiinnerannik uiguusersuinermillu ilisimasaqalissasut
2) tusagassiornermi oqaluttuariaatsinik ilisimasaqalernissaat,
3) tusagassiuinermi oqaatsit atorneqartut atuaruminartuunissaat, aamma
4) paasinarluartumik naleqquttumillu tusagassiuinermut oqaatsitigut tunngaviusumik pisinnaasassanik ilisimasaqarlualernissaat.§ 19. Tusagassiorneq attaveqaqatigiinnerlu pillugit isumaliutersuutinik ilinniagassatut sammisami anguniagaavoq ilinniartut makku pillugit ilisimasaqalernissaat
1) nunatsinni avataanilu tamat attaveqaqatigiinnerisa tusagassiuisarnerullu oqaluttuarisaanerani pingaarnerit, tamakkununnga ilanngullugit tusagassiuutit sunniutaannik paasisimanninneq, aamma
2) tusagassiornermik sulinermi atukkat, aaqqissuisoqarfiit aaqqiissuussaasarnerannut tunngaviit aamma tusagassiuutit inuillu atuisut akornanni pissutsinik paasisimasaqarnissaq.§ 20. Tusagassiisarnerni malittarisassat pillugit ilinniagassatut sammisami anguniagaapput ilinniartut makku pillugit ilisimasaqalernissaat
1) kikkulluunniit naqisimaneqaratik oqaaseqarsinnaanerat inatsisini tunngaviusuni illersugaasoq tamatumalu inatsisitigut killiligaanera, tamakkununnga ilanngullugit inuit ataasiakkaat toqqissisimasumik inuuneqarnissaasa innimiilliorfigineqannginnissaannik aamma inoqatinut nikanarsaataasunik oqaaseqartannginnissamut pinerluttulerinermi inatsimmi aalajangersakkat kiisalu piginnittussaatitaanermut tunngaviusumik aalajangersakkat pingaarutillit,
2) tusagassiuisarnerni akisussaassuseqarneq pillugu inatsimmi malittarisassat, tusagassiuinermi ileqqut pitsaasut, akissuteqarsinnaatitaaneq aamma Tusagassiuisarnerit pillugit Aalajangersaasarfik, aamma
3) Inatsisiliortarnerni, allaffissornikkut ingerlatsinerni aamma eqqartuussisarnerni tamanut tusarliisarnermut tunngaviit.§ 21. Ilinniagassatut sammisami ileqqorissaarnermi/pissuserissaarnermi siunertarineqarpoq ilinniartut makku pillugit ilisimasaqalernissaat
1) tusagassiornermi ileqqussat pitsaasut pillugit malittarisassat allassimasut allassimanngitsullu malittarisassaat, aamma
2) misissueriaatsini assigiinngitsuni ileqqorissaarnermi/pissuserissaarnermi ajornartorsiutaasartut isumaliutigisariaqartullu.
Imm. 2
§ 22. Sulilluni sungiusarnermi ilinniartut sulianik ilinniakkaminnut tunngasunik nalinginnaasunik aaqqissuussinermillu misilittagaqalernissaat kiisalu nammineerlutik sulisalernissaminnut pisinnaasaqalernissaat anguniagaapput.
Imm. 3
§ 23. Ilinniagassatut sammisami tusagassiornermi tusagassioriaatsinik tusagassiortutullu sulinermik ilinniartitaanerup immikkoortuani siullermi ilitsersuutigineqartartunik ilinniartut suli annerusumik ilisimasaqalernissaat sungiusarnissaallu anguniagaapput, taakkununnga ilanngullugit tusagassiassanik pilersaarusiornermik sungiusarnerit.
§ 24. Ilinniagassatut sammisami inuiaqatigiilerinermi anguniagaapput ilinniartut nunani tamalaani paasinnittaatsinik paasisimasaqalernissaat nunani tamani pisunik naliliisarluni misissueqqissaarsinnaalersitsisunik, ajornartorsiutitaannik erseqqissaasinnaalersitsisunik ingerlatitseqqissinnaalersitsisunillu aamma tamakkua tunuliaqutaannik kingunerannillu.
§ 25. Oqaatsinut tunngasunik ilinniagassatut sammisami siunertaavoq ilinniagaqartut:
1) oqaluttuariaatsinik sukumiisumik ilisimannilernissaat,
2) oqaatsit sakkutut atornissaat pillugit isumaliutersornikkut sulinikkullu misissuisarnerminni suliaminnik itisilerisinnaalissasut, tamakkununnga ilanngullugit tusagassiortutut saqqummiussisinnaanerit, pisunik ilungersunartunik saqqummiussisinnaalernerit kiisalu isumassarsiorluni oqaatsinik atuisinnaanermut tunngasut,
3) naliliisarluni misissueqqissaarsinnaalernerit ilinniarnerup immikkoortuani siullermi sammineqartut ineriartorteqqissagaat, aamma
4) tusagassiornermi ileqquliussatut periaatsit atorlugit atornagillu pissusissamisoortumik, oqitsumik paasiuminartumillu allassinnaanngornissaat.§ 26. Inaarutissamik soraarummeerusiornissap suliarineqarnissaani siunertarineqarpoq ilinniartut tusagassiornermi periaatsinik ilikkarsimanerisa nammineerlutillu sulisinnaalersimanerisa uppernartunngortinnissaat.
Kapitali 4.
Ilinniartitaanermi misilitsinnerit il.il.Ilinniartitaanermi misilitsinnerit siunertaat
§ 27. Ilinniartitaanermi misilitsinnerit siunertaraat ilinniagaqartup pisinnaasaqarfiisa anguniakkanut piumasaqaatinullu ilinniartitaanermut peqqussummi nalunaarummilu matumani kiisalu ilinniakkamik aaqqissuussinermi aalajangersakkanut naapertuunnerisa naliliivigineqartarnissaat. Misilitsinnerni angusinerit soraarummeersimanermut allagartamik tunniussinissamut tunngaviliisuusassapput.
Ilinniarfimmit avataanillu naliliisoqarluni misilitsinnerit nassuiaataat
§ 28. Misilitsinnerit ilinniarfimmit avataanilluunniit naliliisoqarluni pisarput.
Imm. 2. Ilinniarfimmit naliliisoqarluni misilitsinnerit tassaapput misilitsinnerit soraarummeersitsisumit ataatsimit arlalinnilluunniit naliliivigineqartut.
Imm. 3. Avataanit naliliisoqarluni misilitsinnerit tassaapput misilitsinnerit soraarummeersitsisumit ataatsimit arlalinnilluunniit aamma censorimit, Ilinniartitaanermut Pisortaqarfimmit taamatut pisussaaffiligaasumit naliliivigineqartut.
Allattariarsornermi misilitsinnerit
§ 29. Allattarissanik misilitsinnerit Tusagassiornermik Ilinniarfimmit suliarineqartassapput.
Imm. 2. Misilitsinnerit soraarummeertussanut tamanut ataatsimut assigiissapput.
Imm. 3. Misilitsinnerni nakkutilliisoqartassaaq.
Imm. 4. Ilinniartitaanerup ingerlanerata naareernerani ilinniartut misilitsittarnerminni allattarissanik akissutigisimasatik imminnut tunniuteqqusinnaavaat.
Oqaluttariarsornermi misilitsinnerit
§ 30. Soraarummeersitsineq ilinniartitsissutitut sammisamik soraarummeerutaasumik ilinniartitsisuusumit ilinniartitsisuusunilluunniit ingerlanneqassaaq, taamaalilluni ilinniartitsisoq tassaassalluni soraarummeersitsisoq. Soraarummeersitsineq sapinngisamik soraarummersitsisup soraarummeertullu akornanni oqaloqatigiinnertut ilusilersugaassaaq, tassanilu censori peqataasinnaalluni. Atortut ilinniagaqartup ilinniartitsissutitut sammisanik suliaqarneranut annertunerusumik uppernarsaatitut iluaqutigineqarsinnaasut soraarummeersitsinermi ilanngunneqarsinnaapput.
Imm. 2. Censori soraarummeersitsisorlu naliliiniarnermi kisimiissapput. Soraarummeertoq naliliisoqareerneratigut karakterissatut aalajangiunneqartoq pillugu tunngavilersugaasumik ilisimatinneqarsinnaavoq.
Imm. 3. Ilinniagaqartoq piareersarnissamut piffissaqartitaasimappat tamanna nakkutilliisoqarluni pissaaq.
Imm. 4. Oqaluttariarsornermi misilitsinnerit tamanut ammasuupput.
Misilitsinnerit naliliisarnerillu
§ 31. Ilinniartitaanerup immikkoortua siulleq misilitsinnernik naliliinernillu makkuninnga imaqarpoq:
1) Tusagassiorneq: Ilinniartup naammassiniarlugit sulianut tamanut peqataasimanera nalilerneqartassaaq ima: "angusivoq" imaluunniit "angusinngilaq". Tusagassiornermik suliat ilinniartumit suliarineqartut tunngavigalugit avataaneersunik naliliisoqarluni misiliisoqartassaaq.
2) Inuiaqatigiilerineq: Ilinniagaqartup ilinniartitaanerit immikkoortortaannut nunatsinni naalakkersuinikkut pissutsinut, aningaasaqarnermut aamma eqqartuussiveqarnermut peqataasimanera nalilerneqartassaaq ima: "angusivoq" imaluunniit "angusinngilaq". Ilinniartitsissutitut sammisaq naggaserneqartassaaq avataaneersunik naliliisoqarluni oqaluttariarsornikkut misilitsinnermik.
3) Oqaatsit: Ilinniartup ilinniartitaanerup immikkoortuani oqaluttuariaatsitigut periaatsini peqataasimanera nalilerneqartassaaq ima: "angusivoq" imaluunniit "angusinngilaq". Avataaneersunik naliliisoqarluni kalaallisoornermik misilitsittoqartassaaq.
4) Tusagassiorneq attaveqaqatigiinnerlu pillugit atuagarsornikkut ilisimasassat kiisalu tusagassiinermi malittarisassaqarne aamma ileqqorissaarneq / pissuserissaarnerlu: Ilinniartup ilinniartitsissutitut sammisani peqataanera sammisani tamani immikkut nalilerneqartassaaq ima: "angusivoq" imaluunniit "angusinngilaq".
Imm. 2. Ilinniartitaanerup immikkoortuani siullermi suliat tusagassiortutut piginnaasat tamatigoortut tunngavigalugit nalilerneqartassapput, tamakkununnga ilanngullugit paasissutissanik katersisarnerit kiisalu oqaatsinik atuineq paasissutissanillu siaruarterineq.
Imm. 3. Ilinniartitaanermut Pisortaqarfik, pissutsit immikkut ittut pisariaqartissappassuk ilinniartitaanerulluunniit ineriartortinneqarneranut atatillugu imm. 1-imi aamma 2-mi aalajangersakkanik immikkut ittumik akuersinikkut sanioqqutitsisinnaavoq.§ 32. Ilinniartitaanerup immikkoortuata aappaani piffissat sulilluni sungiusarfiusut tamarmik naaneranni sulilluni sungiusarnernik naliliisoqartassaaq piffissami sulilluni sungiusarfiusumi ilinniartup peqataanera nalilerneqartassalluni ima: "akuerineqarpoq" imaluunniit "akuerineqanngilaq". Sulilluni sungiusarfiusuni akisussaallutik pisortat peqatigalugit sulillutik sungiusartut aamma Tusagassiornermik Ilinniarfik, sulilluni sungiusarnerit nalilissaavaat, tamatumani ilinniartup sulilluni sungiusarnermini takkuttarnera aamma sulinera minnerpaamik naliliiffigineqassallutik.
Imm. 2. Piffissap sulilluni sungiusarnerup ilassutaasup naalernerani § 37 naapertorlugu imm. 1-imi allaaserineqartutut naliliisoqartassaaq.
Imm. 3. Ilinniartitaanermut Pisortaqarfik, pissutsit immikkut ittut pisariaqartissappassuk ilinniartitaanerulluunniit ineriartortinneqarneranut atatillugu imm. 1-imi aamma 2-mi aalajangersakkanik immikkut ittumik akuersinikkut sanioqqutitsisinnaavoq.§ 33. Ilinniarnerup immikkoortuisa pingajuanni ilinniartitsissutini tusagassiornermi, inuiaqatigiilerinermi aamma oqaatsini ilinniartup peqataaneranut "angusivoq" imaluunniit "angusinngilaq" naliliissutigineqassapput.
Imm. 2. Inaarutissamik soraarummeerusiorneq avataaneersumik naliliisoqarluni oqaluttariarsorlunilu misilitsinnermi nalilerneqassaaq, tamatumani ilinniartup sammisaminik toqqaanini, suleriaatsini aamma paasissutissanik katersinini nassuiassavai. Naliliineq ingerlanneqassaaq soraarummeersitsisumit, censorimit ataatsimit kiisalu suliamut aalajangersimasumut tassunga peqataasussanngortinneqarluni immikkut ilisimasalimmit, tak. § 42.
Imm. 3. Ilinniartitaanermut Pisortaqarfik, pissutsit immikkut ittut pisariaqartissappassuk ilinniartitaanerulluunniit ineriartortinneqarneranut atatillugu imm. 1-imi aamma 2-mi aalajangersakkanik immikkut ittumik akuersinikkut sanioqqutitsisinnaavoq.
Ilinniarnermi misilitsinnernut peqataanissamut nalunaarneq piumasaqaatillu
§ 34. Ilinniartoq ilinniartunngornermigut ilinniarnermi misilitsinnernut peqataasussatut nalunaarpoq.
§ 35. Ilinniagaqarnermi peqataaneq, tak. § 12, akuerineqarsimassaaq ilinniartitsissutitut sammisani ataasiakkaani ilinniartoq misilitsinnerni peqataatilersinnagu.
Misilitseqqittarneq
§ 36. Ilinniartoq ilinniartitsissutini tamani 6-imit appasinnerusumik karakterilerneqarsimagaangami misilitseqqinniarsinnaavoq.
Imm. 2. Ilinniartoq ilinniartitsissummut ataatsimut marloriaannarluni misilitseqqinniarsinnaavoq.
Imm. 3. Ilinniartitaanermut Pisortaqarfik, pissutsit immikkut ittut pisariaqartissappassuk imm. 1-imi aamma 2-mi aalajangersakkanik immikkut ittumik akuersinikkut sanioqqutitsisinnaavoq.§ 37. Ilinniartup sulilluni sungiusarnera akuerineqarsinnaanngitsutut nalilerneqarpat tamatumani akuerineqanngitsortai ataasiarluni uteqqissinnaavai.
Imm. 2. Ilinniartoq maanaannakkut sulilluni sungiusarnerminik unitsitsippat sulillunilu sungiusarneq ilinniarfimmi allami imaaliallaannaq nangeqqinneqarsinnaanngippat sulilluni sungiusarneq pillugu naliliisoqassaaq ilinniarfik sulillunilu sungiusarfik naliliinissamut naammattunik tunngavissaqarneranik isumaqatigiippata. Akerlianik pisoqarpat ilinniartoq sulilluni sungiusarnerminik uteqqiisariaqassaaq.§ 38. Ilinniartoq nappaammik taamaaqataanilluunniit nakorsamit uppernarsaatitaqartinneqartumik takkutinngitsoortarnernik tamatumunngaluunniit naligitinneqartumik pissuteqarluni misilitsinngikkuni Ilinniartitaanermut Pisortaqarfiup pisuni ataasiakkaani tamani aalajangernera naapertorlugit misilitsissaaq, misilitsinnerli taanna kingusinnerpaamik pissaaq ilinniartitsissutitut sammisaq pineqartoq tullissaanik misilitsiffiulerpat.
§ 39. Ilinniartoq misilitsikkiartunngippat, tak. § 38, misilitsinnermullu peqataassanani nalunaaruteqanngippat, misilitsinneq angusiffiunngitsutut naatsorsuunneqassaaq.
Soraarummeerutissat aamma apeqqutit soraarummeerfiusussat
§ 40. Soraarummeerutissat tassaapput ilinniartitsissutitut sammisani ataasiakkaani misilitsinnerni ilinniartup soraarummeerutigisai. Soraarummeerutissat ilinniartitsisumit ilinniartitsisunilluuniit ilinniartitsissummik aalajangersimasumik ilinniartitsisutitut sammineqartut akornannit ilinniartup oqaloqatigineqareerneratigut toqqarneqassapput.
Imm. 2. Apeqqutit soraarummeerfiusussat tassaapput apeqqutit soraarummeersitsinermi tunngavigineqartut. Apeqqutit soraarummeerfiusussat ilinniartitsisumit imaluunniit ilinniartitsisunit ilinniartitsissutitut sammisami ilinniartitsisuusunit suliarineqassapput.
Imm. 3. Taamaattorli soraarummeertussap tusagassiatut suliaa soraarummeerutigineqassappat tusagassiatut suliaq soraarummeersitsinermi tunngavigineqassaaq.§ 41. Soraarummeerutissat apeqqutillu soraarummeerfiusussat kingusinnerpaamik soraa-rummeernissaq sapaatip-akunnerinik sisamanik sioqqullugu censorimut akuerisassanngorlugit saqqummiunneqassapput.
Imm. 2. Soraarummeerutissanut apeqqutinullu soraarummeerfiusussanut oqaaseqaatit tiguneranniit ullut arfineq-marluk qaangiutsinnagit saqqummiunneqassapput. Tamatuma kingorna Tusagassiornermik Ilinniarfik oqaaseqaatinik tigusaqarsimanngippat censori soraarummeerutissanik apeqqutinillu soraarummeerfiusussanik akuersisutut isigineqassaaq.
Imm. 3. Soraarummeertussap suliaa soraarummeersitsinermi tunngavigineqassappat, soraarummeerutissaq taanna soraarummeernissaq sapaatip-akunneranik ataatsimik sioqqullugu censorimut misissugassanngorlugu nassiunneqassaaq.
Imm. 4. Soraarummeertussap tusagassiatut suliaa soraarummeersitsinermi tunngavigineqassappat, soraarummeerutissaq taanna soraarummeernissaq sapaatip-akunneranik ataatsimik sioqqullugu censorimut misissugassanngorlugu nassiunneqassaaq. Tusagassiornermik Ilinniarfiup tusagassianik naliliinermi tunngavigisartagai nalinginnaasut ilanngullugit aamma nassiunneqassapput.
Censorit aamma sulianik ilisimasallit
§ 42. Ilinniartitaanermut Pisortaqarfik censorinik ivertitsisussaavoq. Censorit ilinniartitsissutini tamani avataaneersunik naliliisoqarluni soraarummeerfiusuni peqataasassapput.
Imm. 2. Inaarutissamik soraarummeerusiap nalilerneqarnerani, tak. § 33, imm. 2, Tusagassiornermik Ilinniarfimmit toqqarneqassaaq suliamik ilisimasalik peqataatitaasussaq sammisanik inaarutissamik soraarummeerusiornermi pineqartunik immikkut ilisimasalik. Suliamik ilisimasalik censoritut ivertitatut maleruagassaqartitaalluni aningaasarsisinneqassaaq.§ 43. Censorit nakkutigissavaat:
1) ilinniarnermi misilitsinnerit, taakkununnga ilanngullugit suliat allattariarsukkat, siunertanut peqqussummi, nalunaarutini ilinniarnermillu aaqqissuussinermi aalajangersarneqartunut naapertuunnersut,
2) misilitsinnerit ilinniartitaanermut malittarisassat atuuttut naapertorlugit ingerlanneqarnersut, aamma
3) ilinniartut assigiimmik naapertuilluartumillu pineqarnersut aammalu takutitsinerit tutsuiginartumik karakteriliisarnermi malittarisassat malillugit nalilerneqarnersut.
Imm. 2. Sulianik ilisimasalittut toqqarneqartup censori soraarummeersitsisorlu inaarutaasumik soraarummeerusiornermi paasissutissat pillugit ilinniartup nassuiaanerata ilumuussusia pillugu ilitsersuisuusassapput. Paasisimasalittut aggersagaq naliliinerni peqataasassanngilaq.
Misilitsinnerni pissusissaritinneqartunik saneqqutsinerit
§ 44. Ilinniarfimmi pisortaq ilinniarnermi misilitsinnerit nalunaarut manna naapertorlugu ingerlanneqartarnissaannut akisussaavoq.
Imm. 2. Misilitsinnerni pissusissaritinneqartunik saneqqutsinerit ingerlaannartumik Ilinniartitaanermut Pisortaqarfimmut nalunaarutigineqartassapput.§ 45. Ilinniartitaanermi pisortaq ima pisoqarpat soraarummeertumik anisitsisinnaavoq:
1) soraarummeertoq unioqqutitsilluni allanik ikiortissarsippat, atortunik akuerisaanngitsunik atortoqarpat imaluunniit allap suliaa suliamisut saqqummiuppagu, imaluunniit
2) soraarummeertoq unioqqutitsilluni misilitsinnermi allamik ikiuippat ikiuiniarsimappalluunniit.
Kapitali 5.
Karakteriliisarneq§ 46. Ilinniartitsissutini assigisaannilu misilitsitsiviusuni katakteeriliinermi13-skala atorneqartassaaq.
Kapitali 6.
Angusinissamut piumasaqaatit§ 47. Tusagassiortutut ilinniarnermi angusinissamut piumasaqaataapput:
1) pikkorissartitsinerit ilinniarnerillu ilinniartitaanermut ilaasut tamaasa aamma sulilluni sungiusarnerit ilanngullugit qaqisiffigineqarsimassasut imaluunniit akuersissutigineqarlutik, aamma
2) karakteriliunneqartut tamarmik minnerpaamik 6-imiissasut tassanngaluunniit qaffasinnerullutik.
Kapitali 7.
Nalunaarsuiffiit aamma soraarummeernermut uppernarsaatit§ 48. Ilinniarfimmi pisortaq ilinniartunut tamanut nalunaarsuiffissamik allattuiffeqassaaq. Ilinniartoq pillugu inuttut paasissutissat, ilinniartitsissutitut sammisat toqqagai, uppernarsaatit, nalunaarut malillugu peqataannginnissamut allatullu peqataannginnissamut immikkut pineqarnissamut akuersissutit sulillunilu sungiusarnerit aamma misilitsinnermi karakterit nalunaarsuiffimmut allattorneqartassapput.
§ 49. Ilinniartut Tusagassiornermik Ilinniarfimmi angusisimasut soraarummeernermut uppernarsaammik pissapput. Uppernarsaat inunnut ataasiakkaanut tamanullu atuuttunik paasissutissartaqartassaaq.
Imm. 2. Inunnut ataasiakkaanut tunngasortaani nalunaarutigineqartassapput:
1) ilinniartoq pillugu inuttut paasissutissat aammalu ulloq ilinniarnerup naammassiffia
2) sulilluni sungiusarnermi ilinniarnerni naliliinerit, aamma
3) ilinniartitsissutitut sammisani ataasiakkaani tamani naliliinerit, suliat aamma inaarummik soraarummeerusiorluni suliaq.
Imm. 3. Oqaasertani tamanut atuuttuni nalunaarummi §§ 7, 8 aamma 47 ilanngunneqartassapput.
Imm. 4. Soraarummeernermut uppernarsaat ilinniarfimmi pisortamit ilinniartoq pillugu allattukkat tunngavigalugit suliarineqassaaq. Ilinniarnermi pisortap uppernarsaat atsiussavaa.
Imm. 5. Ilinniartoq ilinniarnerminik naammassinnginnermini unitsitsiinnarsimasoq misilitsinnerit aamma sulilluni sungiusarnerit akuerineqarsimasut pillugit uppernarsaatitaannik piumasinnaavoq.
Kapitali 8.
Atuutilerfia§ 50. Nalunaarut ulloq 1. august 2001 atuutilerpoq. Ilinniartut 1997-imi decembarip aallaqqaataa sioqqullugu sulilluni sungiusarnermik nalinginnaasumik aallartitsisimasut ulloq taanna tikillugu malittarisassat manna tikillugu atuuttut naapertorlugit ilinniarnerminnik naammassinnissapput.
Imm. 2. Tamatumunnga peqatigitillugu tusagassiortunngorniartunik ilinniartitsineq pillugu Namminersornerullutik Oqartussat nalunaarutaat nr. 43, decembarip 22-anni 1993-imeersoq atorunnaarsinneqarpoq.
Namminersornerullutik Oqartussat, ulloq 26. juli 2001.
Lise Lennert/
Karl Kristian Olsen